亞視去年8月遷入大埔新廠房地方闊落見使，不過搬廠後卻意外頻頻，多名員工意外重創或病逝，最慘係邪氣瀰漫總台，近日有女藝人包括莊思敏和蘋果（何卓盈）在廁所遇怪事、又有幕後搭電梯撞，人人爭住見鬼。
人心惶惶，本刊獲悉亞視高層為安撫員工，上月初臨請高人睇風水，於電視台入口擺5隻麒麟鎮壓，仲連台徽都改埋。猛到咁，我收睇亞視奧運會唔會見到？好驚喎！
即將主持北京奧運Lulu吳亭欣，雖未親身撞過鬼卻聽過猛鬼電梯傳聞：「我都聽過有同事度撞鬼，仲話門閂極閂唔到，嚇到我家搭夜都驚呀！」
亞視總台去年8月由廣播道搬到大埔工業後，接二連三發生事故，先後有兩名攝影記者工作時撞傷頭部重創，原來暗盤邪事仲有一籮籮。據亞視員工透露：「農曆年前有個女幕後沖涼時突然暈救唔番；另外創作部有個新同事突然又話生cancer，捱1個月就過身；仲有個清潔阿嬸，2樓廁所做做暈，送醫院後都係救唔番。」
祈福兒戲
不幸事接二連三，有人認為係搬新廠房時未有拜神所致，於是在3月12日請來法師起壇為員工祈福，有份上香員工獲派一封利是，但面只有紅紙寫上「出入平安」、「身體健康」等好意頭字句。當時亞視公關及宣傳助理總監林淑兒仲話：「唔使搵師傅睇風水。」
點知法事之後，電視台開始鬧鬼，高層惟有急請玄學家再睇風水變陣，除擺重麒麟陣外，大堂、建築圍牆都髹成綠色，上月22日更開始改台徽，對於亞視鬼話連篇，亞視發言人區展程稱：「轉綠色都係想感覺光猛，員工撞鬼我未聽過，麒麟都係普通風水，大家唔好咁敏感！」
麒麟鹽罌辟邪
亞視頻傳鬧鬼，在上月初更專登於門口擺了5隻麒麟，再於旁邊放了一個裝滿鹽及六枚銅錢的白樽，據玄學家麥玲玲稱：「呢個陣可以辟邪保平安，如果真係鬧鬼應該可以幫到手。」
恐怖傳說詭異電梯
亞視大堂電梯一開門對正塊大鏡，而且電梯燈光昏暗，有傳有職員夜晚一個人由4樓搭落地下，鏡度見到個白色衫女人跟住入，點知該員工一擰轉頭卻唔見有人存在，嚇到該員工即刻掣閂門，最驚係道門閂又彈開，雖然最後都順利到達大堂，但該職員已經嚇到面青。
親身經歷莊思敏鏡中白影
最近被亞視捧為iconmodel的莊思敏凌晨時分到位於大堂轉角位的女廁如廁後洗手時，在鏡中見到身後有人形白影飄過再消失，莊思敏當堂嚇到魂飛魄散，衝出廁所向保安員求救，保安員入內卻無發現。
亞視大堂女廁位於幽暗長走廊盡頭，莊思敏話：「我個女廁撞埋咁，以後都唔敢去啦，就算幾急都死忍到屋企先解決！
親身經歷蘋果何卓盈女廁歌聲
亞視大堂的女廁盛傳最多怪事，有傳最近為亞視主持《AV事務所》節目的蘋果（何卓盈）就聽到有女人在廁格內唱歌，但檢查所有廁格卻冇發現人影。本刊記者向蘋果求證，但據知她因為怕開罪亞視冇得撈而否認，她驚青地說：「我都係唔講咁多啦，我驚公司鬧。.
自動出水
記者親身觀察該女廁時，要按掣的水喉竟無端端自動有水流出，係巧合定係邪門？大家自己諗！
全台盡綠
亞視搵人睇完風水，麥玲玲師傅認為大埔亞視新廠樣樣大執確實奇怪：「成個大堂外牆都用綠色，有安穩、保平安作用，減少員工受傷或出意外機會；麒麟、銅錢則有助辟邪。」
台徽加字
以往台徽只有「atv」字樣，4月22日開始，原有台徽底下，加上綠底白字「本港台」字樣，不過呢個綠底白字只在熒幕出現大約兩秒便褪走，熒幕只留下舊台徽。
舊
新
圍牆轉綠
剛搬入大埔新廠房時（右圖），外牆及圍牆全部白色，最近亦已全部轉為綠色。
新
舊
頸繩要綠
亞視最近宣傳活動時連地毯都要棄紅用綠，甚至員工的工作證頸繩都要全綠。