Week 27
MON
病o左一個禮拜，返到公司，居然搵唔到自己個位喎。我初初以為病懵o左，後來真係發覺有唔妥，原來佢地換o左我個秘書。
坐o係度o既係一個自稱 Fifi o既十八歲左右女仔，好似o係 boutique 請番o黎咁o既。
於是乎就走去人事部質問，諗住要求佢地俾番個四眼妹我，點知得到o既答覆係，四眼妹已經調o左去尖沙咀分公司。我大發雷霆，問點解調人唔知會我一聲，o個個主任級o既光頭佬好無奈咁同我講：「公司一向係咁做，出 memo 就調人，我地照本子辦事。」
我唔可以再束手待斃，我上卅四樓搵趙經理。
趙經理一見到我，立刻遞個 file 俾我，個 file 有成本電話簿咁厚。我一睇個封面，嚇o左一跳，原來係新廣告o既 proposal，最恐怖o既，就係裏面仲有一份廣告合約o既副本，已經簽好o左。
我問趙經理：「點可以咁，未詳細考慮其他公司o既計劃，點可以咁草率決定？」
佢笞我話：「呢份 contract 係通過董事局會議o既。」
我再問：「點解唔等埋我番o黎至決定？」我知我問得好蠢，我係邊個？
趙經理笑o左一笑，反問我：「董事會可以決定任何公司o既事，我都想預埋你o架，但係唔好意思開口。」
呢次是我自討沒趣。
過到自己間房，望住窗口o個盆盆栽，忽然覺得自己同棵o野一樣，放o係度，只係一棵識得呼吸o既廢物。
TUE
(目訓)o向床上面唔想返工，就好似細個唔想返學一樣。細個唔想返學o既原因係：o的同學唔「侵」我玩。而家呢？公司o的人一樣唔「侵」我玩。
屋企坐到十點，Q 太郎早已經返工，我慢慢洗乾淨每一隻杯，每一隻碟，只係拖延時間，唔想返工。
我剛剛想出門口之際，門鐘響，送o黎一份電報，係我o係美國o個個老婆阿 Ann 打過o黎o既。
拆開電報一睇，我知乜o野事喇。
電報上面寫住：「阿寬，我對你唔住，阿 Ann。」
我睇完，初時冇咩事，但係愈諗愈驚：佢到底做咩事對我唔住呢？
樂觀o的諗……佢可能忘記o左我o既生日。冇理由o既，我有排至生日。
悲觀o的諗，佢唔通……唔通俾綠帽我戴？佢o係美國識o左個男人同佢……？
愈諗愈驚，打成日電話俾阿 Ann，冇人聽。電話錄音機不斷重複阿 Ann o既聲音，叫我「嘟」一聲之後，留低 message！
結果每次「嘟」一聲之後，我都唔知問乜，都係默然收線。
WED
諗一百四十幾種阿 Ann 會對我唔住o既情形。
放o左工，一個人去飲酒，本來係兩個人o既，Q 太郎甩o左底，因為佢要開 OT。
帶o左少少醉意去停車場(手羅)車，見到一對男女嘻嘻哈哈攬埋一舊，雙方攬到實一實，好似摔角咁，我勉強認得o個個女仔，o係 Dionne！
我想擰開唔睇，但係 Dionne 已經見到我，佢一手推開個男人，撥一撥亂o左o既頭髮，向我「Hi」一聲。
我唯有行過去打個招呼，行埋去，至知自己o既高度到o個個男人o既下巴。
Dionne 介紹個男人俾我識，佢叫做 Remeo。o個個 Remeo 打量我一眼，問我：「你係我上一手？」
我聽到當堂打個突，再問佢：「你講乜話？」
我望望 Dionne，佢好尷尬咁 dup 低頭。
Remeo 顯然飲唔少酒，佢一手攬住 Dionne 膊頭，騎騎笑咁話：
「大家出o黎玩，坦白o的嘛！」
我唔知點解，一聽到佢咁講，撞起火上o黎，一手撥開佢攬住 Dionne o既手，大聲同佢講：「你咪掂佢！」
我都講完，塊面就俾人抬起，我見到一個拳頭好快好快咁飛埋眼前面，然之後我就眼前一黑。有一張變o左樣o既人面貼埋我o個度，我對耳聽到有一把男人聲問我：「而家我掂唔掂得佢？」
我覺得個鼻有o的水湧緊出o黎。我聽到 Dionne 終於開聲，佢向 Remeo 話：「我今晚冇心情玩，你走啦！」
我聽到 Remeo「哼」一聲，我跌落地。我可以感覺到 Dionne 同我抹緊鼻血，佢一邊幫我抹，我一邊話：「Dionne，佢唔係好人o黎o架！」
Dionne 答我：「起碼，佢未結婚！」俾佢咁樣一講，我冇聲出，坐o係地下，Dionne 繼續講：「寬，我都唔係好女仔o黎o架！ 」
我掙扎起身，大聲話：「我唔理你！總之我覺得佢唔認真！我唔可以俾o的唔認真o既人掂你！」
我聽到 Dionne 問：「咁你自己呢？」
我冇答佢，只係好認真咁望佳佢。
THU
尋晚成晚冇(目訓)，Q 太郎烚o左隻蛋俾我碌個鼻，今朝佢仲同我貼o左塊膠布o係個鼻度。
公司o的人見我個樣，除o左唔表示同情，仲笑我。
收到林太一張 invitation card，係請我聽晚去參加佢結婚五周年o既紀念。聽晚開 party，佢今日至俾 card 我，都真係有o的荒謬。
晏晝開個好無聊的 meeting。
返o黎林生俾電話我，佢叫我聽日最緊要去香格里拉參加佢個 party。
我推佢唔到，唯有應承去。
FRI
到底人地結婚周年紀念可以送o的咩俾佢地呢？尤其係人地個太太你係鍾意o既。
我真係諗唔到，我o係街上面行o黎行去，點都唔可以兩手空空去o架。
諗o黎諗去，都係買o左對金筆。
我去到已經遲o左，林生林太o係度切蛋糕影相之際，大家居然好驚訝咁向我望過o黎，我立即以為自己冇拉拉鍊、冇扣鈕之類，點知唔係。
我擰轉面，原來鄧生o向我後面，佢行路歪歪斜斜咁，一陣酒氣。
我上前想扶住佢，佢一手推開我，就搶上去攬住林太，話恭喜佢。
林生一味講多謝，想同鄧生握手，點知鄧生已經一嘴錫落林太個嘴上面！
幾個同事覺得過分，上前拉開鄧生，鄧生死唔放手。
最後好似扯大纜咁將兩個人扯開，鄧生哈哈大笑，仲大聲咁講：「都係兩個人o個陣親熱o的！」
我見到林生對眼好似要噴火咁滯，林太已經大步走出去。
鄧生依然哈哈大笑。
林生一個飛身，撲過去，好似飛魚撲水咁，可惜俾我半空一拉拉住，叫佢去追林太緊要。
鄧生o係幾個經理級人士護送之下離場。成班人o係度等，等o左個幾鐘頭，一一散去。
我亦都o係人群之中行出酒店。
佢地兩個會點呢？我好想知，亦唔想知。
SAT
星期六，我唔敢講得太詳細，因為，絕大部分o既內容，都係兒童不宜o既，或者俾我提o的貼士，等你地自己去估喇。
星期六，我(目訓)到凌晨四點左右，門鐘響。林太滿面淚痕走o黎搵我，佢坐低粒聲唔出，就係咁，我望住林太，林太望住窗外面滂沱大雨，望到星期六朝早七點幾。
佢同我講：「林生好嬲，根本冇俾機會我去解釋，仲用好多最下賤o既形容詞o黎鬧我，佢……」
林太講唔落去，因為，佢已經開始喊。我下意識o既做法，就係上前攬實佢。
唔知過o左幾耐，大家都(目訓)著o左，醒番，已經係晚上七點幾。我醒先，原來我地已經(目訓)係我張床上面，林太仲當我心口係枕頭，令我呼吸有o的困難，難怪我發夢夢見自己需要氧氣筒。
我冇叫醒佢，由佢(目訓)，我只係輕輕變換(目訓)覺o既姿勢。望住林太，我諗番起阿 Ann、Jenny、Rosa、Dionne，我做緊乜呢？我不斷問自己，我做緊乜呢？
SUN
果日，即係星期日，個天仍然好唔俾面咁落雨。
林太著住我件睡衣，打大赤腳煮早餐比我食。我一直望住林太，到今日我至發覺佢唔單只對手靚，對腳亦一樣咁靚。
就係呢個時候，門鐘響，我同林太都打個突，邊個呢？
行埋門邊，o向個窿仔度望出去，o下！係……係林生！
林生滿身酒氣行入o黎，坐o左o係梳化，兩隻手係咁抓o的頭髮，佢額頂o的頭髮本來唔係好多，愈抓愈見頂。
佢向我訴苦，話林太成晚冇返屋企，佢到而家都未係好接受自己個太太同人有染。
我一路聽，個心一路內咎，如果佢知道自己個太太o係我房赤大腳，會點呢？
林生叫我教佢點做，其實呢個時候我自己都六神無主，唯有口窒窒同佢講：「事情已經發生，主要問題係在乎你仲愛唔愛呢個女人。」
林生猶豫一陣，點頭同我講，佢已經太習慣有一個太太，佢唔可以想像自己冇o左太太o既生活會係點。
最後，我應承林生如果見到林太，就勸佢返屋企。
林生臨走時，仲好感激咁捉住我個膊頭，大力拍我背脊。
佢每拍一下，我就心跳加速。佢終於走！
今日，聽講某處地方落雹。