在香港《變形金剛》26號上映，但21號已有優先場，有人以行動表示，喪將老變玩具改裝，進入瘋狂狀態。其實患上「老變癲狂症」何止佢地，坊間連衫、飾物和八達通等，都成老變天下。如今全城在「變」，問你點頂！
香港變形狂迷真瘋狂，警車路障成為改造目標，仲變身成香港紅色的士！劊子手阿車話︰「路障外形最似的士，改造過程只係花5小時。最難反而係貼字。一般水貼唔适合用，我叫朋友以工業用的特別Printer幫我印字。至於車頂燈箱，在其他鐵車仔拆出来。」但阿車睇完戲後擔心路障玩具會炒貴，要快手買番架，因為佢只買入一架，亦已改成的士。
至於SikorskyCH-53直升機在戲中最早出現，有份睇戲的阿Lu，竟將黑狂改成飛行服務隊的直升機︰「初時HK-TF諗住搞個同香港特色有關的展覽，例如將玩具改成香港才有的交通工具。」有眼見，新黑狂樣都變埋，玩開高達模型且向來愛改件的阿Lu話︰「之前改過史達，但只係令活動性增大，今次花1個月時間改黑狂，過程唔算困難。」高手改慣改熟自然當等閒事，叫普通都市人花成個月改件玩具，唔只困難，更係奢侈。
